La Liga ka nisur procedura ligjore ndaj lojtarëve që morën pjesë në protestën gjatë javës së 9-të të kampionatit, e lidhur me planin për ta zhvilluar ndeshjen Villarreal–Barcelona në Miami.
Sipas raportimeve të Marca, në atë kohë lojtarët e të dy skuadrave ndalën lojën për 10 sekonda si shenjë kundërshtimi ndaj iniciativës së La Liga-s. Presidenti Javier Tebas kishte paralajmëruar se nuk do ta linte pa pasoja këtë veprim, ndërsa tani është bërë e ditur se po ndërmerren hapa ligjorë.
Në dokumentin e ankesës thuhet se La Liga ka pësuar rreth 8 milionë euro humbje si pasojë e bojkotit.
Ndërkohë, Shoqata e Futbollistëve Spanjollë ka reaguar duke theksuar se gjesti i lojtarëve ishte shprehje e lirë ndaj refuzimit të ligës për të negociuar një propozim që prekte kushtet e punës, duke shtuar se protesta nuk ndikoi realisht as te ndeshjet dhe as te vetë kampionati.
