Një shpërthim i fuqishëm është regjistruar mëngjesin e së hënës në një fabrikë hekuri dhe çeliku të kompanisë Habaş, në zonën e Aliağës, në Izmir të Turqisë.
Pas shpërthimit, në ambientet e fabrikës ka shpërthyer edhe një zjarr, duke bërë që në vendngjarje të mbërrijnë menjëherë forcat zjarrfikëse, të cilat kanë nisur operacionet për vënien nën kontroll të flakëve.
Sipas informacioneve paraprake, nga shpërthimi ka humbur jetën një punonjës, ndërsa 14 persona të tjerë kanë mbetur të plagosur. Tre prej të plagosurve raportohet se ndodhen në gjendje të rëndë.
Në lidhje me ngjarjen ka reaguar edhe ministri i Brendshëm i Turqisë, Mustafa Çiftçi, i cili bëri të ditur se të gjitha strukturat përgjegjëse janë angazhuar që në momentet e para pas incidentit.
“Një shpërthim dhe zjarri që pasoi ndodhën në një fabrikë hekuri dhe çeliku në Izmir. Që nga momenti i parë i incidentit, të gjitha njësitë tona përkatëse po bashkëpunojnë në mënyrë të koordinuar në terren, duke zhvilluar pa ndërprerje operacionet e kërkim-shpëtimit, shuarjes së zjarrit dhe ndërhyrjes”, deklaroi ministri.
Autoritetet vijojnë ndërhyrjen në vendngjarje, ndërsa priten informacione të mëtejshme për shkaqet e shpërthimit.
