Emërimi i Andrea Pirlos si trajner i ri i kombëtares italiane është komplikuar papritur për shkak të bashkëpunimit të tij me një kompani ruse bastesh.
Sipas “Sky Sport”, roli i ish-mesfushorit si ambasador global i kompanisë Fonbet ka shkaktuar debate të forta në Itali dhe mund të pengojë firmosjen e kontratës me Federatën Italiane të Futbollit.
“La Gazzetta dello Sport” raporton se Pirlo duhet ta ndërpresë marrëveshjen me kompaninë përpara se të marrë zyrtarisht drejtimin e “Azzurrëve”, për shkak të rregullave të rrepta italiane për reklamimin e lojërave të fatit.
Çështja ka kaluar edhe në nivel politik, me disa përfaqësues italianë që kanë kritikuar kandidaturën e tij dhe kanë kërkuar që trajneri i ardhshëm i kombëtares të ndërpresë çdo lidhje me kompaninë ruse.
Zyrtarizimi ende nuk ka ardhur. Raportimet e mëparshme pretendonin se Pirlo kishte arritur marrëveshjen me federatën pas refuzimit të Pep Guardiolës, por drejtuesit italianë nuk kanë reaguar ende publikisht.
