Parlamenti italian ka miratuar reformën e re zgjedhore të propozuar nga qeveria e Giorgia Melonit, një ndryshim që pritet të ndikojë drejtpërdrejt në zgjedhjet e ardhshme parlamentare. Reforma parashikon një bonus mandatesh për koalicionin që arrin të paktën 42 për qind të votave.
Sipas sistemit të ri, koalicioni që kalon këtë prag do të përfitojë një bonus që mund t’i sigurojë shumicën parlamentare. Qeveria e Melonit e argumenton reformën me nevojën për të krijuar qeveri më të qëndrueshme dhe për të shmangur parlamentet e fragmentuara.
Por opozita e ka kundërshtuar ashpër ndryshimin. Partitë opozitare e akuzojnë qeverinë se po ndryshon rregullat elektorale në një mënyrë që mund të favorizojë bllokun e qendrës së djathtë, i cili aktualisht drejtohet nga Meloni.
Reforma vendos gjithashtu kërkesa të reja për koalicionet. Ato duhet të paraqesin paraprakisht një kandidat për kryeministër dhe një program të përbashkët. Pikërisht këtu shfaqet një nga problemet kryesore për opozitën italiane, e cila ende përballet me ndasi mes Partisë Demokratike dhe Lëvizjes Pesë Yjet për mënyrën se si duhet të ndërtohet një alternativë e përbashkët ndaj qeverisë.
