Prej tre ditësh 50 mjete të tonazheve të rënda kanë mbetur në pikën e kalimit kufitar të Qafë Thanës, pjesa më e madhe e së cilëve janë kamionë që vijnë nga Turqia dhe Maqedonia.
Drejtuesit e mjeteve tregojnë se prej 3 ditësh ndodhen në pritje për të vazhduar udhëtimin por ajo çfarë ka ndodhur në vendin e quajtur Ura e Arrave ka detyruar të qëndrojnë në pritje.
Njeri nga drejtuesit e mjeteve tregon se pritja e madhe ka shkaktuar probleme ekonomike për të dhe shumë të tjerë.
“Prej tre ditësh jemi këtu. Jemi vërtet në gjendje të vështirë. Qeveria duhet të bëjë diçka për këtë situatë. Si një qytetar turk, më vjen shumë keq që shqiptarët ndodhen në një gjendje të tillë. Shqiptarët janë vëllezërit tanë. Ne duam që edhe këtu të ndërtohen rrugë moderne. Makinat tona po shkatërrohen. Sa herë kalojmë këtu, i çojmë automjetet në servis. Gjendja e rrugës është shumë e rëndë. Prej tre ditësh po presim këtu në vështirësi. Jemi në situatë të keqe. Flemë në kamion. Nuk kemi as një vend afër ku të hamë diçka, as restorant pranë, as vend ku të blejmë ushqim. Çdo gjë është shpenzim. Vërtet jemi në gjendje shumë të vështirë.
Çfarë do të bëjmë? Do të presim. Jemi të detyruar të presim. Nuk kemi alternativë tjetër. Do të presim hapjen e rrugës. Kur do të hapet rruga? Kjo tashmë varet nga ju”, është shprehur një nga drejtuesit e automjeteve.
Një tjetër drejtues mjeti nga Turqia thotë që puna e tyre ka mbaruar tashmë ndërsa i duhet të flejë prej ditësh në kamion.
“Buka jonë mbaroi, që nga e diela jemi këtu. Sot është dita e tretë. Sipas informacionit që kemi marrë nga klienti, thonë se rruga do të hapet të premten në provë. Dje na thanë se do të hapej, pritëm, por thanë se dolën probleme më të mëdha. Po presim, s’kemi çfarë të bëjmë. Po fle në mjet, brenda në automjet. Erdhëm këtu, rruga ishte e mbyllur. Ndoshta do të zbresim poshtë në qytet, në pazar, të blejmë diçka dhe të kthehemi. Po presim, jemi të detyruar të presim.
Mund të shkojmë edhe në Kosovë. Nuk mund të bëjmë dokumentet këtu. Nëse i bëjmë në Kosovë, mund të hyjmë sërish në Shqipëri nga Kosova. Por atje nuk po na i bëjnë. Një shok shkoi, por nuk ia bënë. U kthye prapë”, u shpreh ai.
Vetëm në pikën e kalimit kufitar të Qafë Thanës hyjnë dhe dalin me shume se 200 mjete të tonazheve të rënda, pjesa më e madhe vijnë nga Turqia e Maqedonia ndërsa në dalje volumin me të madh të eksporteve e kanë fermerët e fushës së Myzeqesë./ Lajmi u mor nga Euronews Albania
