Në fjalimin e tij presidenti Donald Trump u shpreh se do të njihte vetëm dy gjinitë ku dhe nënshkroi një urdhër ekzekutiv duke përjashtuar njohjen zyrtare të personave transgjinorë. Pas këtij urdhëri, Departamenti i Shtetit të SHBA-së ka bërë të mundur mbylljen e website-it i cili u jepte mundësinë qytetarëve përzgjedhjen e gjinisë alternative në pasaportat amerikane.
Ky website informonte qytetarët se mund të zgjidhnin një nga tre opsionet për gjininë në pasaportat e tyre: mashkull (M), femër (F) ose X për një indetitet të papërcaktuar. Kjo lëvizje përmbys politikat e mëparshme që kishin zgjeruar të drejtat e personave transgjinorë dhe jo-binarkë në dokumentet zyrtare.
Në urdhrin ekzekutiv të firmosur në ditën e parë në detyrë, Trump deklaroi se qeveria federale do të njohë vetëm dy gjini , mashkull dhe femër, duke argumentuar se “këto gjini janë të pandryshueshme dhe bazohen në realitetin themelor dhe të pakundërshtueshëm.” BBC shkruan se ndryshimi ka ngjallur shqetësime në komunitetet transgjinore brenda dhe jashtë SHBA-s, ndërsa shumë shtete amerikane të drejtuara nga guvernatorë progresistë kanë premtuar të vazhdojnë njohjen e gjinive të ndryshme në nivel lokal.
Gjithashtu, mbështetësit e Trump e kanë vlerësuar vendimin duke e cilësuar si një masë mbrojtje ndaj vlerave tradicionale dhe familjes.
