Gjermania ishte e para që siguroi biletën për në gjysmëfinalet e Ligës së Kombeve. Gjermanët barazuan 3-3 në Dortmund ndaj Italisë, por shkuan në gjysmëfinale pas fitores në ndeshjen e parë në transfertë 1-2.
Në 3 ndeshjet e tjera, u desh të shkohej në kohën shtesë. Në Lisbonë, koha e rregullt mes Portugalisë dhe Danimarkës përfundoi 3-2 për vendasit, ndeshja e parë ishte fituar 1-0 nga danezët. Në kohën shtesë, portugezët shënuan që në fillim golin e katërt me Trincao, i dyti për të në këtë takim. Në minutën e 115-të, Portugalia shënon dhe golin e pestë me Goncalo Ramos, që vendosi përfundimisht kualifikimin për në gjysmëfinale, aty ku i pret Gjermania. SHIKOGOLAT
Në “Mestalla” të Valencia-s, koha e rregullt mes Spanjës dhe Holandës përfundoi në barazim 2-2, njësoj si në ndeshjen e kaluar në Rotterdam. Në kohën shtesë, Spanja gjeti sërish avantazhin në minutën e 102-të me Lamine Yamal, i cili shënoi një gol shumë të bukur pas asistit të mrekullueshëm që mori nga Dean Hujisen. Holandezët barazuan shifrat 3-3 pesë minuta më vonë, me penalltinë e fituar nga Xavi Simons dhe ekzektuar saktë po nga ai. Fatin e kualifikimit për në gjysmëfinale e vendosi “ruleta ruse” aty ku spanjollët u treguan më të saktë.
Për vendasit gaboi vetëm Lamine Yamal, ndërsa për holandezët gaboi Noa Lang dhe penalltia që ishte vendimtare u gabua nga Donyell Malen. SHIKOGOLAT
Në “Stade de France”, koha e rregullt mes Francës dhe Kroacisë përfundoi 2-0 për vendasit, rezultat i njëjtë me atë të ndeshjes së parë në Split. Rezultati nuk ndryshoi as në shtesën prej 30 minutash. Nga pika e bardhë e penalltisë, francezët u treguan më të saktë, duke u kualifikuar për në gjysmëfinale, aty ku i pret Spanja. SHIKOGOLAT
