Bayern Munich ka konfirmuar se Harry Kane i është nënshtruar me sukses një ndërhyrjeje kirurgjikale pas dëmtimit të rëndë të pësuar në ndeshjen ndaj Këlnit.
Sipas njoftimit zyrtar të klubit bavarez, sulmuesi anglez pësoi një çarje të ligamentit sindesmotik në kyçin e majtë dhe u operua me sukses në orët e para të së shtunës.
Kane u dëmtua pas një përplasjeje me Joel Schmied brenda zonës së penalltisë. Gjyqtari nuk akordoi faull, ndërsa edhe VAR-i vlerësoi se nuk kishte shkelje.
33-vjeçari tentoi të vazhdonte ndeshjen, por dhimbjet nuk e lejuan dhe në minutën e 20-të u zëvendësua nga Tom Bischof.
Pas operacionit, Kane do të nisë programin e rehabilitimit në javët e ardhshme.
Drejtori sportiv i Bayern Munich, Max Eberl, ka konfirmuar se periudha e mungesës pritet të shkojë deri në rreth tre muaj, ndërsa Vincent Kompany ka folur gjithashtu për një ndalesë disa mujore.
Dëmtimi vjen në një moment të vështirë për Bayernin, që ka tashmë disa lojtarë të rëndësishëm jashtë, mes tyre Manuel Neuer, Alphonso Davies, Serge Gnabry, Luis Díaz dhe Ismael Saibari.
Mungesa e Kane është një goditje e rëndë për repartin ofensiv, pasi anglezi mbetet një nga lojtarët më të rëndësishëm të skuadrës si në realizimin e golave, ashtu edhe në ndërtimin e lojës.
Sezonin e kaluar, Kane regjistroi 61 gola në 51 ndeshje në të gjitha kompeticionet dhe fitoi Këpucën e Artë europiane për herë të dytë në karrierë.
Tashmë, fokusi i Bayern Munich dhe i sulmuesit anglez do të jetë rikuperimi, me objektivin për t’u rikthyer në fushë gjatë pjesës së dytë të sezonit.











