Departamenti amerikan i Sigurisë Kombëtare po përshpejton shpenzimet për deportimet, qendrat e ndalimit dhe projektet kufitare, pavarësisht humbjeve të republikanëve në zgjedhjet e mesmandatit dhe rritjes së presionit politik ndaj politikës së emigracionit të Donald Trump. Administrata po përpiqet të përdorë fondet e miratuara nga Kongresi për të zgjeruar operacionet e dëbimit, përpara se demokratët të marrin kontrollin dhe të nisin hetimet e tyre.
Sipas të dhënave të kontratave qeveritare, agjencitë e emigracionit kanë nënshkruar marrëveshje me vlerë dhjetëra miliardë dollarë për fluturimet e deportimit, infrastrukturën kufitare, transportin e të ndaluarve dhe zgjerimin e kapaciteteve të burgjeve të emigracionit. Vetëm një kontratë për fluturimet e dëbimit arrin rreth 1.3 miliardë dollarë, ndërsa projekte të tjera për infrastrukturën kufitare kanë vlerë të paktën 1.5 miliardë dollarë.
Demokratët, të cilët do të kenë më shumë kompetenca mbikëqyrëse në Kongres, po përgatiten të kontrollojnë mënyrën se si janë dhënë kontratat, ku po shkojnë paratë dhe nëse ka pasur abuzime me fondet publike. Megjithatë, anulimi i financimeve të miratuara më parë do të jetë i vështirë, pasi për ndryshime të mëdha do të nevojitet bashkëpunimi i administratës Trump. Ndërkohë, zyrtarët e sigurisë kombëtare po vijojnë projektet, në një përpjekje për të konsoliduar politikën e deportimeve përpara ndryshimit të kontrollit në Kongres.











