Kursi i këmbimit Euro–Lek ka vijuar prirjen rënëse edhe në ditët e fundit, duke shënuar një nivel rekord të ulët. Sipas të dhënave zyrtare të Bankës së Shqipërisë, euro u këmbye sot me 96.46 lekë, niveli më i ulët i regjistruar ndonjëherë.
Sipas operatorëve të tregut valutor, kjo rënie vjen si pasojë e rritjes së ofertës së valutës, një dukuri tipike për periudhën e fundvitit. Rikthimi i emigrantëve për festat rrit qarkullimin e euros në treg, duke ushtruar presion në ulje mbi kursin e këmbimit.
Në krahasim vjetor, euro paraqitet rreth 2.1% më e dobët ndaj lekut krahasuar me të njëjtën periudhë të një viti më parë. Megjithatë, ekspertët theksojnë se qëndrueshmëria relative e kursit gjatë vitit 2025 nuk është rezultat vetëm i faktorëve të tregut, por edhe i ndërhyrjeve të Bankës së Shqipërisë.
Banka Qendrore ka vijuar blerjet e valutës edhe përgjatë këtij viti. Deri në fund të nëntëmujorit 2025, janë blerë rreth 800 milionë euro, ndërsa gjatë vitit 2024 shuma totale kishte arritur në 933 milionë euro. Në mungesë të këtyre ndërhyrjeve, rënia e euros ndaj lekut do të kishte qenë edhe më e theksuar.
Ndërkohë, Banka e Shqipërisë ka njoftuar se për vitin 2026 planifikon të rrisë blerjet e valutës në tregun e brendshëm, duke synuar deri në 450 milionë euro përmes ankandeve, me synimin për të forcuar rezervat valutore të vendit.
