Kuvendi do të zhvillojë të enjten seancë plenare me rend dite të ngjeshur, ku në fokus do të jenë interpelancat me disa ministra dhe një sërë projektligjesh.
Seanca do të nisë me miratimin e procesverbalit të mbledhjes së 5 tetorit dhe njoftimet përkatëse. Në rendin e ditës është parashikuar një interpelancë urgjente me ministrin e Punëve të Brendshme, Ervin Demo, e kërkuar nga një grup deputetësh të Partisë Demokratike.
Po ashtu, do të zhvillohen dy interpelanca me ministrin e Infrastrukturës dhe Energjisë, Enea Karakaçi, si dhe një interpelancë me ministrin e Financave, Petrit Malaj. Mes çështjeve kryesore është edhe projektligji për ndarjen administrativo-territoriale të njësive të qeverisjes vendore, i cili kërkon shumicë të cilësuar votash për miratim.
Në fund të seancës do të hidhet në votim edhe projektvendimi për ngritjen e një komisioni hetimor për kontrollin e ligjshmërisë së veprimtarisë së shoqërisë shtetërore KAYO, ndërsa deputetët do të kenë edhe 60 minuta në dispozicion për diskutime për çështje jashtë rendit të ditës.
