Shqipëria ka marrë një fitore dramatike 2-1 ndaj San Marinos në Tiranë, falë një penalltie të realizuar nga Kristjan Asllani në minutën e 93-të.
Kuqezinjtë e nisën ndeshjen në mënyrën më të mirë dhe kaluan në avantazh që në minutën e 11-të. Asllani lëshoi një goditje të fuqishme nga distanca dhe mposhti portierin Colombo për 1-0.
Shqipëria krijoi disa mundësi për të dyfishuar rezultatin, me rastin më të mirë që erdhi në minutën e 22-të, kur Rey Manaj goditi shtyllën. Edhe Hoxha, Mehmeti dhe Uzuni patën mundësitë e tyre, por pa gjetur rrjetën.
Mosrealizimi i rasteve i kushtoi kuqezinjve në minutën e 66-të. Lazzari u gjend i lirë pas një krosimi në zonë dhe me të djathtën mposhti Dajsinanin, duke barazuar shifrat në 1-1.
Shqipëria u hodh e gjitha përpara në minutat e fundit, por San Marino rezistoi deri në kohën shtesë. Në minutën e 90-të kuqezinjtë pretenduan për prekje të topit me dorë në zonë dhe, pas rishikimit në VAR, arbitri akordoi penallti.
Asllani mori përsipër ekzekutimin dhe në minutën e 93-të nuk gaboi nga pika e bardhë, duke realizuar golin e tij të dytë personal dhe atë të fitores 2-1.
Një triumf shumë i vuajtur për Shqipërinë, që ishte pranë një barazimi tepër zhgënjyes ndaj San Marinos, por në fund merr tri pikët dhe feston vendin e parë në Grupin C1.
