Autoritetet ruse kanë njoftuar se nuk është zbuluar asnjë rast i murtajës te personat që kanë pasur kontakt me punonjësen 28-vjeçare të një instituti kërkimor kundër murtajës në Irkutsk, e cila vdiq javën e kaluar nga një pneumoni me origjinë ende të panjohur.
Rreth 200 persona u vendosën fillimisht në karantinë dhe iu nënshtruan testimeve të përditshme. Autoritetet zbuluan disa raste COVID-19 dhe infeksione me rinovirus, por asnjë rast murtajeje apo sëmundjeje tjetër të rëndë infektive.
Organizata Botërore e Shëndetësisë konfirmoi se Rusia i ka raportuar se në Irkutsk nuk ka raste të murtajës. Megjithatë, ende nuk është e qartë nëse murtaja është përjashtuar plotësisht si shkak i vdekjes së punonjëses së laboratorit.
