Saga e JJ Gabriel po i afrohet fundit. Talenti 16-vjeçar i Manchester United pritet të bëjë të ditur destinacionin e tij të ardhshëm në ditët në vijim, pas më shumë se një viti bisedimesh dhe negociatash.
Sipas raportimit, Real Madrid ka fituar garën përpara Barcelonës, PSG-së dhe Bayern Munich, ndërsa Manchester United ka bërë përpjekje të shumta për ta bindur lojtarin të qëndrojë.
Klubi anglez madje e përfshiu Gabriel në një ndeshje të ekipit të parë në kupë kur ai ishte vetëm 15 vjeç, por kjo nuk ndryshoi vendimin e lojtarit dhe familjes së tij.
Plani për largimin nga Anglia kishte nisur shumë kohë më parë, por transferimi hasi disa pengesa të rëndësishme.
E para lidhej me pasaportën europiane. Gabriel kishte nevojë për të për të mundësuar largimin nga Mbretëria e Bashkuar, ndërsa pak ditë më parë arriti ta siguronte atë falë origjinës irlandeze të babait dhe asaj qipriote të nënës.
Pengesa e dytë ishte mosha. Deri më 6 tetor, kur mbushi 16 vjeç, një operacion i tillë nuk mund të hynte në fazën përfundimtare.
Më pas mbeti vetëm vendimi përfundimtar i klubit madrilen, i cili e analizoi me kujdes transferimin për shkak të ndërlikimeve ligjore që shoqërojnë marrëveshjet me futbollistë të mitur.
Juni Calafat ka qenë në kontakt të vazhdueshëm me përfaqësuesit e lojtarit dhe, sipas raportimit, tashmë është dhënë drita jeshile për përfundimin e operacionit.
Plani fillestar parashikon që JJ Gabriel të nisë aventurën në Valdebebas me Castilla-n, përpara se të kërkojë rrugën drejt ekipit të parë.
Real Madrid e sheh 16-vjeçarin si një investim afatgjatë dhe një nga talentet me potencialin më të madh të brezit të tij.
Pas muajsh pritjeje dhe konkurrencës së fortë nga disa prej klubeve më të mëdha të Europës, vendimi final tashmë duket vetëm çështje ditësh.
