Familja e Lionel Messit ka reaguar pas lajmeve të fundit për gjendjen shëndetësore të babait të tij, Jorge Messi.
Në një komunikatë drejtuar tifozëve dhe mediave, familja ka konfirmuar se Jorge Messi po përballet me probleme shëndetësore, por ndodhet nën kujdes mjekësor dhe po tregon përmirësim pozitiv.
“Familja Messi njofton se Jorge Messi aktualisht po përballet me probleme shëndetësore.
Në këtë moment, ai ndodhet nën mbikëqyrje mjekësore, po rikuperohet dhe po tregon përparim pozitiv, duke marrë parasysh rrethanat.
Në lidhje me raportimet, thashethemet dhe spekulimet që kanë qarkulluar në orët e fundit, familja dëshiron të shprehë shqetësimin e saj të thellë për mungesën e taktit, respektit dhe përmbajtjes me të cilën disa kanë trajtuar këtë çështje rreptësisht private familjare.
Familja dëshiron gjithashtu të sqarojë se vetëm të afërmit më të ngushtë të Jorges kanë informacion të saktë dhe të besueshëm për gjendjen e tij. Për këtë arsye, çdo version, deklaratë apo informacion që nuk vjen drejtpërdrejt nga familja dhe përmes kanaleve zyrtare nuk duhet të konsiderohet i saktë apo i vërtetë.
Në momente të tilla, bëjmë thirrje për përgjegjësi, maturi dhe njerëzillëk. Shëndeti i një personi dhe qetësia e të dashurve të tij nuk duhet të bëhen objekt spekulimesh apo vëmendjeje të papërgjegjshme mediatike.
Jemi sinqerisht mirënjohës për shprehjet e dashurisë, respektit dhe shqetësimit që kemi marrë, dhe kërkojmë të respektohet privatësia, konfidencialiteti dhe hapësira personale e Jorges dhe e gjithë familjes së tij gjatë këtij procesi.
Çdo përditësim i rëndësishëm do të jepet në kohën e duhur nga familja dhe përmes kanaleve përkatëse.
Faleminderit për mirëkuptimin”, thuhet në komunikatë.
Sipas raportimeve, tifozët kishin vënë re emocionet e Lionel Messit gjatë ndeshjes së Botërorit ndaj Algjerisë, ku ai u përlot pavarësisht fitores së Argjentinës. Më pas u raportua se reagimi i tij lidhej me situatën shëndetësore të babait.
