Vllaznia dhe Skënderbeu e kanë nisur edicionin e ri të Abissnet Superiores me një barazim 2-2 në “Loro Boriçi”, në një sfidë që dhuroi të gjitha golat në pjesën e dytë.
Pas një fraksioni të parë pa gola, shkodranët e nisën furishëm pjesën e dytë. Bekim Balaj realizoi dy herë brenda katër minutave, në të 50-ën dhe të 54-ën, duke krijuar përshtypjen se Vllaznia po shkonte drejt fitores.
Skënderbeu nuk u dorëzua dhe reagoi menjëherë. Janaqi ngushtoi diferencën në minutën e 57-të me një goditje të bukur nga distanca, ndërsa Bismark realizoi golin e barazimit në të 75-ën.
Në minutat e fundit, Vllaznia mbeti me 10 lojtarë pas kartonit të dytë të verdhë të Duliç, por korçarët nuk arritën të përfitonin.
Sfida u mbyll 2-2, me Vllazninë që la t’i ikte avantazhi prej dy golash dhe Skënderbeun që mori një pikë pas një rikthimi të fortë.
