Një atentat ka ndodhur këtë të dielë në Balldren të Lezhës, ku 39-vjeçari Kreshnik Mujeci së bashku me bashkëshorten e tij, mbetën të vrarë me breshëri plumbash.
Deri më tani raportohet se pista kryesore e policisë është hakmarrja, pasi viktima Kreshnik Mujeci është akuzuar për pjesëmarrjen në vrasjen e Genc Mhillaj në vitin 2016.
Ndërsa bëhet me dije se 39-vjeçari rezulton të ketë qenë një prej mbështetësve të banorëve të Rrjollit, të cilët prej disa muajsh po protestojnë kundër ndërtimit e një resorti në këtë rajon, pasi pretendojnë pronësinë mbi këtë truall.
Përmes një video në rrjetet sociale, Mujeci ka bërë thirrje që qytetarët të protestojnë krah banorëve të Rrjollit, në mbrojtje të tokave të tyre.
“I bëj thirrje gjithë Shqipërisë: Amanet o gjaku i shqiptarit, mos t’i lëmë këta këlyshë të luajnë kufinjtë e të parit. Të mbetet histori djal pas djali. Mbani mend çfarë po ju thotë malësori i Kelmendit“, deklaron ai.
