Përpjekjet diplomatike për t’i dhënë fund luftës në Ukrainë po intensifikohen, me një takim kyç të planifikuar mes të dërguarit të posaçëm të Presidentit Trump, Steve Witkoff, dhe Presidentit rus Vladimir Putin.
Sipas zëdhënësit të Kremlinit, Dmitry Peskov, takimi pritet të zhvillohet në “gjysmën e dytë të ditës”, ndërsa theksoi se nuk do të diskutohen vijat e kuqe të Rusisë dhe se “diplomacia e zëshme” nuk sjell rezultate.
Vizita e Witkoff në Moskë vjen pas negociatave të zhvilluara në Florida me delegacionin ukrainas.
Administrata amerikane është shprehur optimiste për një marrëveshje të mundshme paqeje, me sekretaren e shtypit të Shtëpisë së Bardhë, Caroline Levitt, që deklaroi se SHBA-të ndihen “shumë optimiste” për progresin.
Megjithatë, ky optimizëm nuk ndahet plotësisht nga aleatët europianë të Ukrainës. Disa prej tyre shprehin shqetësimin se plani i paqes i SHBA-së mund të favorizojë Moskën, duke e vendosur Kievin nën presion për lëshime.
Shefja e politikës së jashtme të BE-së, Kaia Kallas, paralajmëroi se takimi mund të çojë në kompromis të dëmshëm për Ukrainën.
Në Rusi ndodhet edhe Jared Kushner, dhëndri i ish-Presidentit Trump, por Kremlini nuk ka konfirmuar pjesëmarrjen e tij në takimin me Putinin.
Ndërkohë, Presidenti ukrainas Volodymyr Zelensky përsëriti qëndrimin se Rusia nuk duhet të shpërblehet për pushtimin e saj.
Gjatë një konference të përbashkët me Presidentin francez Emmanuel Macron, ai theksoi nevojën për një paqe të drejtë dhe të qëndrueshme.
Zelensky ka zhvilluar gjithashtu biseda me kryeministrin britanik Keir Starmer dhe kancelarin gjerman Friedrich Merz, duke kërkuar mbështetje të mëtejshme nga partnerët europianë.
Ai nënvizoi se lufta duhet të përfundojë sa më shpejt, por pa kompromise që mund të interpretohen si shpërblim për agresionin rus.
