Një skandal i madh ka shpërthyer në Turqi pasi një punonjës i gjykatës në Stamboll u arratis në Mbretërinë e Bashkuar me rreth 25 kilogramë ar dhe 50 kilogramë argjend, të vjedhur nga depoja e provave e Gjykatës Büyükçekmece, konfirmuan autoritetet turke të mërkurën.
I dyshuari, Erdal T., punonjës i zyrës së provave, u zhduk pasi përfundoi një leje zyrtare. Vjedhja u zbulua më 1 dhjetor, kur prokurorët hapën depot dhe i gjetën bosh. Hetimet zbuluan se ai ishte larguar nga Turqia më 19 nëntor, duke udhëtuar së bashku me gruan, Esma T., dhe fëmijët, nga Aeroporti Sabiha Gökçen drejt Londrës.
Para arratisjes, ai kishte dërguar një mesazh miqve në WhatsApp:
“E shitja malli, Zoti ua bekoftë tregjet tuaja.”
Sendet e vjedhura ishin pjesë e provave të rasteve të ndryshme kriminale, përfshirë një dosje për trafikimin e migrantëve. Sipas inventarit, mungonin 9,906 gram ar bullion dhe një sasi e konsiderueshme monedhash dhe bizhuterish, me një vlerë prej rreth 150 milion lirash turke (rreth 3 milion euro).
Prokuroria ka lëshuar urdhra arresti për Erdal T., bashkëshorten e tij dhe një të tretë, Kemal D., i cili kishte akses në çelësat e sigurisë. Kemal D. u arrestua në banesën e tij, ndërsa çifti besohet se ndodhet ende në Britani.
Autoritetet kanë marrë në pyetje gjithë personelin e zyrës së provave dhe kanë kontrolluar banesat e tyre, por nuk kanë gjetur prova që i lidhin ata me vjedhjen. Hetimet vijojnë me shqyrtimin e pamjeve të sigurisë dhe të dhënave telefonike.
