4 ditë para mbajtjes së netëve finale të edicionit të 64-ërt të Festivalit Mbarëkombëtar të Këngës për Fëmijë Shkodër, një postim i bërë nga RTSH në rrjete sociale lidhur me nisjen e përgatitjeve për Junior Fest ka shkaktuar një tronditje të madhe.
Postimi ka shkaktuar zemërim dhe indinjatë mes prindërve të këngëtarëve të vegjel, pjesëmarrës në Festivalin e Këngës për Fëmijë, porr edhe mes konkurentëve.
Por çfarë ka ndodhur?
Një vit më parë, falë marrëveshjes së nënshkruar mes Bashkisë Shkodër dhe RTSH – Radio Televizioni Shqiptar.fituesi/ja e festivalit të Shkodrës në kategorinë 9-14 vjeç do të përfaqësonte Shqipërinë në Junior Eurovision Song Contest, i njohur ndryshe si Eurovisioni për fëmijë. Vendi ynë u përfaqësua me këngëtaren Kroni Pula, që zuri vendin e 6-të në këtë kompeticion evorpian.
Këngëtarët e vegjël, pjesëmarrës të këtij viti, synonin jo vetëm triumfin në skenën e Shkodrës, por edhe pjesëmarrjen në Junior Eurovision, që këtë vit zhvilllohet në Maltë, më 24 tetor.
E ndërsa përgatitjet e konkurentëve dhe prindërve të tyre janë këto ditë në fazën finale, pak para nisjes së udhëtimit të tyre drejt Shkodrës, njoftimi i bërë nga Radio Televizioni Shqiptar se “hap zyrtarisht rrugëtimin e edicionit të radhës së JuniorFest” ka revoltuar familjarët e këngëtarëve të vegjël.
“Ftojmë të gjithë artistët e rinj, këngëtarë, interpretues dhe krijues të bëhen pjesë e këtij rrugëtimi të veçantë, që jo vetëm promovon talentin dhe kreativitetin, por edhe hap dyert drejt eksperiencës më të madhe europiane për fëmijë dhe adoleshentë, asaj të Junior Eurovision Song Contest”,– shkruhet në njoftimin e RTSH-së, duke shkërmoqur kështu pritshmëritë e deritanishme të pjesëmarrësve në Festivalin Mbarëkombëtar të Këngës për Fëmijë Shkodër për një përfaqësim të mundshëm në Eurovizionin për Fëmijë.
Skandali i RTSH-së thellohet edhe më tej, kur një faqe informative me lajmet më të fundit nga Junior Eurovizion njofton në një postim të saj në rrjete sociale se Shqipëria do ta përzgjedhë përfaqësuesin/en e saj në Eurovizionin për Fëmijë më datë 1 qershor, datë kur shpallet fituesi/ja e edicionit të 64-ërt të Festivalit Mbarëkombëtar të Këngës për Fëmijë Shkodër.
Në një kohë kur të huajt duket se janë mjaft të qartë se nga cili festival do të përzgjidhet përfaqësuesi i Shqipërisë në edicionin e këtij viti, duket se RTSH i bën lëmsh të gjithë duke shkërmoqur 4 ditë para finales ëndrrat e 20 konkurentëve junior.
Në kontaktet që “DurrësLajm” pati me prindër të fëmijëve pjesëmarrës na u komunikua se ata e cilësojnë skandaloz një njoftim të tillë, sepse sipas tyre të gjithë konkurentët ishin impenjuar maksimalisht për këngët me të cilat do të prezantoheshin para jurisë së festivalit sepse qëllimi i tyre ishte që sillnin një këngë sa më të bukurm të denjë edhe për Junior Eurovision.
Megjithëse koha deri në ditën e finales është shumë e shkurtër, prindërit janë të vendosur të kontaktojnë të gjitha strukturat shtetërore përgjegjëse për të mos u mohuar me një të rënë të lapsit nga ana e RTSH-së të drejtën fëmijës së tyre, pse jo për të ëndëruar që këtë vit ai ose ajo që do ngjiten në skenën e Evropianit të Fëmijëve.
