Real Madridi mori një fitore të thellë 4-1 ndaj Rayo Vallecanos në “Santiago Bernabéu”, në një ndeshje me dy fytyra për skuadrën e José Mourinhos. Madrilenët dominuan pjesën e parë, por ulën ndjeshëm ritmin pas pushimit dhe shkaktuan edhe pakënaqësi te tifozët.
Mbappé hapi rezultatin nga pika e bardhë pas penalltisë së shkaktuar nga Lejeune, ndërsa pak më vonë Carreras dyfishoi avantazhin pas një kombinimi me francezin. Bellingham realizoi golin e tretë pas asistimit të Viniciusit, ndërsa Mbappé goditi edhe shtyllën përpara pushimit.
Yan Diomande e nisi për herë të parë si titullar, duke marrë vendin e Arda Güler. Talenti tregoi shpejtësinë dhe aftësinë në duelet një kundër një, por ishte turku ai që mori vëmendjen pasi hyri në fushë. Në rreth 20 minuta, Güler ndryshoi ritmin e lojës dhe dhuroi një paraqitje shumë të mirë.
Në pjesën e dytë, Real Madridi humbi kontrollin dhe Camello përfitoi nga një gabim i Viniciusit për të ngushtuar diferencën. Rayo krijoi edhe disa raste të tjera, ndërsa Courtois u detyrua të ndërhynte për të shmangur një rikthim të mundshëm të miqve.
Megjithatë, Mbappé i dha fund çdo dyshimi duke shënuar golin e tij të dytë dhe duke vulosur rezultatin 4-1. Real Madridi regjistroi 24 goditje, 11 prej tyre në portë, por rënia e nivelit në pjesën e dytë tregoi se Mourinho ka ende punë për të bërë.
