Rritja e prodhimit të ullirit gjatë vitit 2026 po shoqërohet me një rënie të ndjeshme të çmimit të vajit të ullirit në Shqipëri, duke vendosur në vështirësi fermerët dhe grumbulluesit.
Në zonat e Belshit dhe Elbasanit, çmimi i grumbullimit të vajit ekstra të virgjër ka zbritur në 500 lekë për litër, nga rreth 700 lekë vitin e kaluar. Kjo përfaqëson një ulje prej afro 29%.
Ndërkohë, në Lushnjë çmimi luhatet nga 500 deri në 600 lekë për litër.
Sipas një raportimi të revistës Monitor, situata po vështirësohet nga çmimet e ulëta që ofrojnë blerësit e huaj dhe nga kërkesa e dobët në tregun vendas.
Përpunuesi dhe eksportuesi Aldo Jolla, nga zona e Belshit, shprehet se blerësit italianë po ofrojnë vetëm 2.5 euro për litër vaj ulliri të paambalazhuar, një çmim që, sipas tij, e bën të paleverdishëm grumbullimin për eksport.
Ai deklaron se ende nuk ka grumbulluar asnjë sasi vaji dhe se, nëse çmimet e eksportit nuk ndryshojnë, mund të mos grumbullojë fare gjatë këtij sezoni.
Situata paraqitet problematike edhe në Elbasan.
Agron Çakalli, drejtues i Federatës Bujqësore të Elbasanit, shpjegon se prodhimi këtë vit është më i lartë, duke ndikuar drejtpërdrejt në uljen e çmimit të grumbullimit.
Megjithatë, rënia e çmimit po detyron shumë fermerë të refuzojnë shitjen.
Për shkak të kostove të shërbimeve bujqësore dhe pagesave të punëtorëve për vjeljen, fermerët po zgjedhin ta mbajnë vajin në shtëpi, në vend që ta shesin me çmime që nuk i konsiderojnë të leverdishme.
Çakalli paralajmëron se kjo situatë mund t’i demotivojë fermerët të kujdesen për ullishtet gjatë vitit të ardhshëm dhe kërkon ndërhyrje me subvencione, veçanërisht për vajin ekstra të virgjër.
Sipas të dhënave të INSTAT, prodhimi i ullirit në Shqipëri ishte 146.7 mijë tonë në vitin 2024 dhe 143.3 mijë tonë në vitin 2025.
Ndërsa sezoni i vitit 2026 po karakterizohet nga një prodhim më i mbarë, shqetësimi kryesor mbetet mungesa e tregut me çmime që mbulojnë kostot.
Për konsumatorët, ulja e çmimit në grumbullim mund të duket një lajm pozitiv. Por për fermerët, ajo rrezikon ta kthejë një sezon të mirë prodhimi në një vit me fitime të pamjaftueshme.
