Në moshën 87-vjeçare, biohakerja Helga Sands është në kërkimi të pavdekësisë. Muajin e ardhshëm, Helga Sands do të udhëtojë drejt Panama për të marrë një “koktej rinovimi” me vlerë 300 mijë funtash, një përzierje proteinash dhe enzimash që është e ndaluar në Mbretërinë e Bashkuar. Sipas saj, trajtimi mund të rigjallërojë trupin dhe mendjen, madje edhe të zgjasë jetën.
Kur nuk udhëton nëpër botë për terapi të reja, ajo konsumon rreth 70 suplemente në ditë, lan flokët me shampo për dele, fle mbi çarçafë me fije argjendi për të reduktuar inflamacionin dhe injekton në trup molekula mikroskopike të marra nga lëngu amniotik. Në pesë vitet e fundit, ajo ka shpenzuar rreth gjysmë milioni funtash për trajtime kundër plakjes.
Sands, gjyshe e tre nipërve dhe banore e kullës Shakespeare Tower në London, thotë se nuk ka interes për idenë e vdekjes apo jetës pas saj. Ajo deklaron se dëshiron të vazhdojë të jetojë sepse ka ende shumë gjëra për të përjetuar dhe nuk sheh kufij për jetëgjatësinë e saj. Kërkimi për pavdekësi zakonisht lidhet me sipërmarrës të rinj dhe të pasur, veçanërisht në Shtetet e Bashkuara. Mes tyre është Bryan Johnson, i cili ka kryer eksperimente të shumta mbi trupin e tij, si dhe Mark Zuckerberg, i cili ka investuar miliona në trajtime kundër plakjes.
Megjithatë, Sands konsiderohet një nga biohakeret më të moshuara në këtë fushë. E lindur në vitin 1938, ajo u largua nga Gjermania naziste gjatë Luftës së Dytë Botërore dhe më vonë u përball me rreziqe gjatë kthimit të familjes së saj në shtëpi, duke ecur për tetë muaj nga Çekosllovakia drejt Dusseldorf-it. Në vitet 1960 u zhvendos në Shtetet e Bashkuara me bashkëshortin e saj të parë, më pas jetoi në Paris dhe në mesin e viteve 1980 bleu apartamentin e saj në Londër, ku jeton edhe sot.
