Banka italiane UniCredit dhe ajo austriake Raiffeisen Bank International kanë njoftuar se, së bashku me shtatë banka të tjera europiane, do të themelojnë një kompani që do të emetojë një kriptovalutë “të denominuar në euro” dhe të mbuluar me asete tradicionale financiare. Përveç UniCredit dhe Raiffeisen Bank International, grupi përfshin edhe bankën belge KBC, bankën daneze Danske Bank, gjermane DekaBank, suedeze SEB dhe spanjolle CaixaBank, ndërsa është e mundur që t’i bashkohen edhe banka të tjera.
Selia e kompanisë së re do të jetë në Holandë dhe do të funksionojë me licencë dhe nën mbikëqyrjen e bankës qendrore holandeze si një institucion i parasë elektronike.
Emetimi i kriptovalutës së mbuluar me asete tradicionale dhe “të denominuar në euro” është planifikuar për gjysmën e dytë të vitit 2026 dhe do të jetë në përputhje me rregulloret e BE-së për tregjet e kripto-aseteve, duke mundësuar pagesa të shpejta e me kosto të ulët.
Emetuesit lidhin paratë digjitale me monedha standarde si dollari apo euro, por dhe me arin dhe argjendin, për të shmangur luhatjet e papritura të vlerës.
Kriptovaluta ofron potencial për transaksione ndërkufitare efikase, pagesa automatike dhe përmirësime në menaxhimin e zinxhirit të furnizimit e në përpunimin e aseteve digjitale.
Një nxitje shtesë për emetimin e kriptovalutave ka ardhur nga SHBA, pasi presidenti Trump përmes “Ligjit GENIUS”, kërkoi që çdo kriptovalutë e re të mbulohet 100 për qind me asete likuide si dollari apo obligacionet afatshkurtra shtetërore.
Konsorciumi prej nëntë bankash europiane thekson se synon të krijojë një alternativë europiane ndaj tregjeve të kriptovalutave, të cilat aktualisht dominohen nga SHBA. Me këtë hap synohet forcimi i autonomise strategjike të Europës në fushën e pagesave.
