Napoli është shpallur fitues i Superkupës së Italisë pasi mposhti Bolognan me rezultatin e pastër 2-0 në finalen e zhvilluar në Riad të Arabisë Saudite. Heroi i mbrëmjes ishte padyshim David Neres, i cili me një magji braziliane dhe një disiplinë taktike tipike për skuadrat e Antonio Contes, i dhuroi napolitanëve një trofe që i mungonte prej 11 vitesh. Në një stadium “Al-Awwal Park” që nuk ishte i mbushur plot, dominimi i kampionëve të Italisë ishte i padiskutueshëm, duke mbytur çdo iniciativë të skuadrës së Vincenzo Italianos.
Ndeshja u zhbllokua në minutën e 38-të me një perlë të vërtetë të Neres. Ish-lojtari i Ajax-it realizoi një goditje të harkuar me të majtën, e cila solli në kujtesë goditjet legjendare të Alex Del Pieros (i pranishëm në tribunë) apo ato të Lorenzo Insignes. Goli i dytë erdhi në minutën e 56-të dhe mbante “vulën” e stilit Conte: një presion i lartë dhe agresiv që detyroi portierin Ravaglia dhe mbrojtësin Lucumi të gabonin, duke i lejuar Neres të shënonte golin e tij të gjashtë sezonal dhe të vuloste fatin e finales.
Takimi u fitua falë një strategjie të qartë taktike. Antonio Conte zgjodhi të mos e kërkonte me ngulm zotërimin e topit, duke ndjekur disi filozofinë e famshme të Mourinhos te Interi i tripletës. Napoli u mbrojt mirë, mbylli hapësirat dhe goditi me shpejtësi përmes krahëve. Hojlund bëri një punë të madhe në mbajtjen e topit, ndërsa mbrojtja e udhëhequr nga Heggem ishte e pakalueshme, duke e mbyllur ndeshjen e dytë radhazi pa pësuar gol.
Për Bolognan dhe trajnerin Italiano, kjo ishte finalja e katërt e humbur nga pesë të fundit, një rezultat i hidhur që gjithsesi nuk e zbeh rrugëtimin fantastik të këtij ekipi. Nga ana tjetër, Antonio Conte shijon trofeun e tij të 10-të në karrierë (Superkupën e tretë personale), duke konfirmuar edhe një herë se ai di të ndërtojë makineri fituese. “Në finale mbhen mend vetëm fituesit,” kishte thënë ai në prag të ndeshjes, dhe në shkretëtirën e Arabisë, Napoli i tij tregoi se ishte i vetmi që meritonte lavdinë.
