Milani ka marrë lajmin që priste për Mike Maignan. Kontrollet mjekësore të kryera në Milano kanë përjashtuar një dëmtim në zonën pubo-adduktore, duke larguar frikën për një ndalesë të gjatë të portierit francez.
Maignan ishte zëvendësuar pas pjesës së parë në sfidën Francë–Turqi për shkak të shqetësimeve në ijën e djathtë, që prekën edhe zonën e aduktorit.
Tashmë, pas rezultateve pozitive të ekzaminimeve, objektivi i Milanit është ta ketë sërish mes shtyllave që këtë të diel ndaj Frosinones në “San Siro”.
Nga infermieria vijnë sinjale pozitive edhe për Fikayo Tomorin. Mbrojtësi po punon individualisht në fushë dhe nga java e ardhshme pritet të nisë gradualisht rikthimin në stërvitje me grupin, me synimin për t’u rikthyer ndaj Cagliarit.
Ndërkohë, Ruben Loftus-Cheek vazhdon programin e rikuperimit sipas afateve të parashikuara. Mesfushori do t’i nënshtrohet një kontrolli të ri pas rreth dy javësh për të përcaktuar hapat e ardhshëm drejt rikthimit në fushë.











