Lionel Messi ka mbyllur përfundimisht kapitullin e tij me kombëtaren e Argjentinës, duke publikuar një mesazh emocional pas 21 vitesh me fanellën bardhekaltër.
“Dje ishte ndeshja ime e fundit dhe tashmë më mungon kjo fanellë. E di që po marr vendimin e duhur. Ishte një rrugëtim i pabesueshëm, plot gëzim dhe edhe disa trishtime, por jam i bindur se çdo hap ia vlejti”, shkroi Messi.
Në mesazhin e tij, 39-vjeçari falënderoi fillimisht familjen, të cilën e cilësoi si mbështetjen më të madhe gjatë gjithë rrugëtimit të tij.
“Kam ende shumë për të thënë. Është e pamundur të shpreh gjithçka që ndiej me pak fjalë apo në një postim. Ky rrugëtim do të ishte i pamundur pa familjen time, që ishte gjithmonë pranë meje, sidomos në momentet e vështira.”
Messi falënderoi gjithashtu shokët e skuadrës, trajnerët dhe stafet me të cilët ka punuar ndër vite, ndërsa bëri një përmendje të veçantë për Diego Maradonën.
“Nuk dua të harroj Diegon, që e vendosi vendin tonë aty ku meritonte të ishte dhe që, siç kam thënë gjithmonë, e di se na ndihmoi si kur ishte mes nesh, ashtu edhe nga qielli.”
Në fund, Messi falënderoi edhe klubet ku ka luajtur, si dhe Zotin, për mundësinë që pati të përfaqësonte Argjentinën për më shumë se dy dekada.
Pas publikimit të letrës, erdhi edhe reagimi i Cristiano Ronaldos.
“Leo, kaq shumë vite duke mbrojtur vendin tënd dhe një histori që do të zgjasë përgjithmonë. I gjithë respekti im për atë që ke arritur me Argjentinën. Një përqafim”, shkroi portugezi.
Pak minuta më vonë, Messi publikoi edhe një “story” në Instagram, ku shihej duke parë drejt qiellit, me një mesazh kushtuar babait të tij të ndjerë:
“Nuk e ke idenë sa shumë na mungove mbrëmë…”
