Frika më e madhe e Paris Saint-Germain është konfirmuar. Désiré Doué ka pësuar këputje të ligamentit të kryqëzuar të përparmë në gjurin e djathtë dhe pritet të qëndrojë jashtë fushave për rreth tetë deri në nëntë muaj.
Dëmtimi ndodhi në minutën e 39-të të fitores 3-2 ndaj Nice, vetëm pak minuta pasi 21-vjeçari kishte shënuar golin e avantazhit 2-1 për parisienët.
Gjatë një tentative për të mbrojtur topin, këmba e djathtë e Doué u përkul në mënyrë të pazakontë pa kontakt me kundërshtarin. Futbollisti u rrëzua menjëherë në tokë, duke kapur gjurin dhe u largua me barrelë mes lotësh.
Luis Enrique kishte paralajmëruar pas ndeshjes se bëhej fjalë për një dëmtim serioz, ndërsa tani diagnoza përfundimtare ka konfirmuar skenarin më të keq.
Ky është dëmtimi i dytë i rëndë në repartin ofensiv të PSG-së brenda pak javësh, pas atij të Khvicha Kvaratskhelias, i cili gjithashtu pësoi këputje të ligamentit të gjurit.
Doué kishte qenë një nga lojtarët më të rëndësishëm të PSG-së këtë sezon, me gola si në Ligue 1 ashtu edhe në Champions League.











