Kapiteni i Italisë, Gianluigi Donnarumma, ka reaguar me shumë emocion pas humbjes së rëndë ndaj Bosnjë-Hercegovinës, një disfatë që i kushtoi Azzurrëve mungesën në Botëror për të tretën herë radhazi. Portieri italian, që nuk arriti ta shpëtonte skuadrën në serinë e penalltive, pranoi publikisht se përjetoi një nga netët më të dhimbshme të karrierës së tij.
Përmes një mesazhi emocional, Donnarumma zbuloi se pas ndeshjes shpërtheu në lot nga zhgënjimi, sepse nuk arriti ta çonte Italinë aty ku mendon se e meriton. Ai theksoi se ndjen një trishtim të madh bashkë me gjithë skuadrën dhe se për të është krenari e madhe të mbajë shiritin e kapitenit, edhe në një moment kaq të vështirë.
Portieri pranoi se fjalët kanë pak vlerë në një situatë të tillë, por ndjeu detyrimin ta ndajë këtë dhimbje me tifozët italianë, të cilët mbeten edhe një herë pa Kombëtaren e tyre në turneun më të madh të futbollit botëror. Reagimi i tij pasqyron qartë tronditjen që ka shkaktuar kjo tjetër dështim historik për Italinë.
Megjithatë, Donnarumma kërkoi që vendi të gjejë forcën për të kthyer faqen edhe një herë. Ai premtoi se skuadra do të nisë sërish nga e para, me synimin për ta rikthyer Italinë në nivelet që i takojnë dhe për t’i dhënë sërish krenari tifozëve të saj.
