Pep Guardiola e ka pranuar hapur se kalendari po e shtrydh Manchester Cityn në një periudhë vendimtare të sezonit dhe se skuadra e tij do të ketë më pak kohë rikuperimi përpara përballjes me Real Madridin. Trajneri katalanas foli para ndeshjes së FA Cup kundër Newcastle, duke e lidhur menjëherë gjithçka edhe me sfidën e madhe në Champions League, që nis të mërkurën në “Santiago Bernabéu”.
Sezoni i Cityt po hyn në javët më të rënda, me një ndeshje vendimtare pas tjetrës. Barazimi i së mërkurës ndaj Nottingham Forest e ka ulur edhe më shumë hapësirën për gabime në luftën me Arsenalin për titullin në Premier League. Në të njëjtën kohë, City ka në horizont finalen e League Cup, një duel të ardhshëm me Artetën në kampionat, dhe mbi të gjitha përballjen e përsëritur me Real Madridin në 1/16-at e Champions-it. Përpara udhëtimit në Madrid, City duhet të kalojë edhe testin e FA Cup ndaj Newcastle në St James’ Park.
Guardiola shpjegoi se fakti që ndeshja ndaj Newcastle luhet në mbrëmje i lejon skuadrës të udhëtojë ditën e ndeshjes, gjë që për të është avantazh logjistik, por ai e pranoi se kjo do t’u kushtojë në aspektin fizik: “Është një avantazh sepse nëse luanim herët do të duhej të udhëtonim sot, ndërsa tani mund ta bëjmë nesër. Por do të kemi më pak kohë rikuperimi para ndeshjes ndaj Real Madridit,” u shpreh ai.
I pyetur nëse pret një ndeshje të ndryshme ndaj Newcastle, Guardiola u shpreh se surpriza nuk do të ketë, sepse skuadrat tashmë njihen shumë mirë: “Do të jetë e njëjta gjë për ta, kështu është. Ne e njohim njëri-tjetrin mirë, nuk do të ketë surpriza. Kemi luajtur ndaj Newcastle të Howe edhe në sezonet e kaluara.” Për O’Reilly-n, trajneri tha shkurt se lojtari ishte ndier më mirë një ditë më parë dhe se do të shihet gjendja e tij.
Guardiola foli edhe për rikthimin gradual të Rodr-it pas mungesës së gjatë, duke theksuar se gjithçka po shkon sipas planit dhe se mesfushori po e gjen dalëngadalë ritmin: ai po merr minuta në mënyrë progresive, po fiton vazhdimësi dhe tani, me kaq shumë ndeshje e udhëtime, lodhja është e pashmangshme, ndaj City duhet të përdorë të gjithë skuadrën.
Në fund, Guardiola theksoi se FA Cup mbetet shumë e rëndësishme për Manchester Cityn, pavarësisht ngarkesës dhe sfidave që vijnë: “Sa gjysmëfinale dhe finale kemi luajtur vitet e fundit? Shumë. FA Cup është shumë e rëndësishme. Po shkojmë në Newcastle për të fituar dhe për të kaluar më tej.”
