Këngëtarja Eli Fara mësohet se ka ndërmarrë hapin e parë ligjor pas publikimit të videove intime që kanë qarkulluar ditët e fundit në rrjet.
Sipas gazetarit Andi Vrapi, ajo ka bërë një denoncim zyrtar në Polici ndaj kompozitorit Adrian Hila.
Lajmi është bërë i ditur nga Vrapi gjatë emisionit “Ora 7” në Klan Kosova, ku ai tha se informacionin e kishte marrë nga burime brenda Policisë.
“Burime brenda policisë, sot në mëngjes kur po shkruheshim, kanë treguar që në fakt Eli Fara e ka marrë guximin dhe ka bërë një denoncim në polici”, deklaroi gazetari.
Nëse konfirmohet zyrtarisht, denoncimi shënon një zhvillim të ri në çështjen që prej ditësh ka marrë vëmendje të madhe publike. Deri tani, Eli Fara kishte zgjedhur të mos reagonte publikisht ndaj materialeve dhe pretendimeve që kanë qarkulluar në rrjet.
Vrapi tha se, pas depozitimit të denoncimit, institucionet kompetente duhet të vijojnë me veprimet që parashikon procedura.
“Kam përshtypjen tashmë nuk ka më asnjë justifikim nga organet kompetente që të bëjnë asgjë më pak e asgjë më shumë se punën e tyre”, u shpreh ai.
Gazetari u ndal edhe te presioni publik ndaj grave emrat e të cilave janë lidhur me videot, duke argumentuar se ato nuk kanë detyrimin t’i japin publikut shpjegime për jetën e tyre private.
“Zonjat në fjalë, të gjitha, jo vetëm dy zonjat e njohura, nuk na kanë neve borxh asnjë deklaratë publike apo një shpjegim”, tha Vrapi.
Zhvillimi vjen ndërsa Adrian Hila është paraqitur në Policinë e Tiranës për të dhënë dëshminë e tij mbi materialet e publikuara. Sipas raportimeve të deritanishme, kompozitori pretendon se videot i janë marrë përmes hakerimit, ndërsa autoritetet po verifikojnë si origjinën e materialeve, ashtu edhe mënyrën e regjistrimit dhe shpërndarjes së tyre.
Deri në një njoftim të Policisë ose konfirmim nga vetë Eli Fara, informacioni se ajo ka depozituar denoncim ndaj Hilës mbetet i bazuar në raportimin e gazetarit Andi Vrapi.
