Justin Gaethje ka realizuar ëndrrën e tij në një nga eventet më të mëdha të UFC-së, duke mposhtur Ilia Topurian me TKO në raundin e katërt dhe duke u shpallur kampion i peshave të lehta në UFC 250 Freedom.
Eventi u zhvillua në një skenë të pazakontë dhe spektakolare, në oborrin e Shtëpisë së Bardhë, me flamuj amerikanë, fishekzjarrë dhe një atmosferë të madhe patriotike. Për Spanjën dhe tifozët e Topurias, mbrëmja pati shije të hidhur, pasi luftëtari gjeorgjiano-spanjoll humbi titullin dhe serinë e tij të pamposhtur.
Topuria e nisi mirë duelin dhe në raundin e parë mori kontrollin e luftës, por Gaethje nisi të gjente ritmin me goditjet e tij të forta. Amerikani e përdori shumë mirë jab-in dhe e vuri në vështirësi “El Matador”, i cili nisi të kishte probleme pas goditjeve të vazhdueshme.
Në raundin e dytë, Topuria reagoi fort dhe goditi rëndë trupin e Gaethje, madje tentoi edhe një triangle choke në tokë, por amerikani arriti të dilte nga pozicioni i rrezikshëm. Më pas, në raundin e tretë, Gaethje mori sërish kontrollin me kombinime të sakta dhe një ritëm shumë agresiv.
Raundi i katërt solli fundin e madh të duelit. Gaethje e çoi luftën në tokë, ndërsa Topuria, edhe pse i dëmtuar rëndë, tregoi zemër të madhe dhe vazhdoi të luftonte deri në fund. Por presioni i amerikanit ishte i papërballueshëm dhe arbitri ndërhyri, duke i dhënë fitoren Gaethje me TKO.
Pas triumfit, Gaethje shpërtheu në festë para publikut amerikan.
“Nuk mund ta besoj ende. E dija që duhej të kaloja raundin e parë. Aftësitë e tij janë të jashtëzakonshme, por këmbëngulja dhe zemra ime më ndihmuan ta mposhtja. Jam krijuar për këto momente”, deklaroi kampioni i ri.
Me këtë fitore, Gaethje jo vetëm që rrëzoi një nga emrat më të mëdhenj të UFC-së, por i mori Topurias titullin dhe pathyeshmërinë në një natë historike për sportin amerikan.
