FIFA ka hequr dorë zyrtarisht nga projekti që parashikonte përfshirjen e investitorëve privatë në menaxhimin e të drejtave komerciale të Kupës së Botës dhe turneve të tjera.
Në deklaratën zyrtare, Gianni Infantino pranoi se propozimi kishte krijuar ndarje të forta dhe se nuk kishte më mbështetjen e nevojshme për të vazhduar.
“Pas dëgjimit të të gjitha qëndrimeve, u bë e qartë se projekti ka krijuar përçarje që e bëjnë atë të paqëndrueshëm. Për këtë arsye, propozimi nuk do të ndiqet më”, njoftoi FIFA.
UEFA përshëndeti tërheqjen, por reagoi ashpër ndaj drejtuesve të FIFA-s, duke kërkuar transparencë dhe përgjegjësi për mënyrën se si ishte përgatitur projekti.
“Udhëheqja aktuale e FIFA-s ka humbur jo vetëm besimin e UEFA-s, por edhe të shumë anëtarëve të tjerë të familjes së futbollit. Marrëveshje të tilla të dyshimta dhe jotransparente nuk mund të përsëriten”, thuhet në deklaratën e UEFA-s.
Konfederata europiane e cilësoi tërheqjen si një fitore për futbollin, por theksoi se procesi për rikthimin e besimit te FIFA sapo ka nisur.
