Dy banesa janë përfshirë nga flakët mesditën e kësaj të shtune në lagjen “Çlirim” të qytetit të Beratit, duke shkaktuar dëme të konsiderueshme materiale.
Sipas informacioneve paraprake, zjarri ka nisur fillimisht në bahçet e dy banesave të pabanuara dhe më pas është përhapur me shpejtësi drejt ndërtesave, i favorizuar nga temperaturat e larta dhe era.
Pas njoftimit të banorëve, në vendngjarje kanë mbërritur forcat zjarrfikëse, të mbështetura edhe nga shërbimet e Policisë, të cilat kanë bërë të mundur izolimin e flakëve dhe shmangien e përhapjes së tyre në banesat përreth.
Flakët rrezikuan edhe çatinë e një banese monument kulture, por zjarri u vu nën kontroll pa shkaktuar dëme të mëtejshme.
Pranë vatrës së zjarrit ndodhej edhe një automjet tip “Ford”, i cili pësoi dëmtime në pjesën e përparme nga nxehtësia dhe flakët, por u largua në kohë, duke shmangur pasoja më të rënda.
Grupi hetimor ka nisur verifikimet për të zbardhur shkaqet e ngjarjes, ndërsa ka dyshimet se zjarri mund të ketë qenë i qëllimshëm.
