Një tërmet me magnitudë 6.1 goditi sot zonën e Sındırgı në Balıkesir, duke u ndjerë fort në disa provinca të rajoneve Marmara dhe Egje, përfshirë Stambollin, Izmirin, Bursën, Tekirdağun, Kocaelin dhe Sakaryan. Sipas Agjencisë për Menaxhimin e Fatkeqeve dhe Emergjencave (AFAD), tërmeti ndodhi në një thellësi prej 5.99 kilometrash.
Ministri i Brendshëm, Ali Yerlikaya, tërhoqi vëmendjen se, fatmirësisht, nuk ka raportime për viktima, ndonëse tre ndërtesa të papërdorura dhe një dyqan janë shembur. Dy individë kanë kërkuar ndihmë mjekësore për shkak të lëndimeve, ndërsa disa zona të Sındırgı kanë pësuar dëmtime të pjesshme. Si masë paraprake, shkollat në Balıkesir janë mbyllur përkohësisht.
Ekipet e AFAD-it, bashkë me institucionet lokale, kanë nisur kërkimet dhe vlerësimet në terren për të analizuar situatën. Guvernatori i Balıkesir, İsmail Ustaoğlu, njoftoi se të gjitha ekipet janë në gatishmëri për të siguruar mbështetje për qytetarët e prekur nga tërmeti. Ai shprehu përkushtimin për të monitoruar situatën dhe për të ofruar ndihmë në nevojë. Gjithashtu, Guvernatori i Qarkut Sındırgı, Doğukan Koyuncu, i informoi mediat se nuk kishte pasur raporte për viktima në fshatra, duke theksuar se puna në terren vazhdon.
Tërmeti i sotëm shkaktoi shembjen e tre ndërtesave, përfshirë dy godina katërkatëshe në Rrugën Akhisar, që kishin qenë evakuuar dhe vulosur më parë për shkak të dëmtimeve nga një tërmet të mëparshëm më 10 gusht. Një tjetër godinë dykatëshe në Sheshin Cumhuriyet, ku ndodheshin tri dyqane në katin përdhes, gjithashtu u shemb.
Incidenti i sotëm ka nxitur shqetësime për sigurinë e ndërtesave dhe është bërë një kujtesë për rëndësinë e përgatitjes për fatkeqësi natyrore në rajon.
