Ashtu siç kishin paralajmëruar ekspertët e ekonomisë, euro ka zbritur në nivelet më të ulëta historike përballë lekut, duke humbur ndjeshëm vlerën e saj.
Në jug të vendit, aty ku është përqendruar fluksi më i madh i turistëve gjatë sezonit veror, shumë biznese po e këmbejnë euron me vetëm 90 lekë të vjetra. Kjo do të thotë se 100 euro sot vlejnë vetëm 9 mijë lekë të rinj, duke u shkaktuar humbje të konsiderueshme shqiptarëve të diasporës që rikthehen për pushime dhe shpenzojnë kursimet e tyre në vend.
Ndërkohë, edhe në pikat zyrtare të këmbimit valutor, euro nuk po këmbehet me më shumë se 93.3 lekë, duke konfirmuar zhvlerësimin e saj në treg.
Rënia e euros prek drejtpërdrejt mijëra familje shqiptare që mbështeten te dërgesat nga emigrantët, pasi të njëjtat shuma në euro përkthehen në më pak lekë.
Po ashtu, zhvlerësimi i monedhës europiane ul vlerën e kursimeve të mbajtura në euro, redukton të ardhurat e bizneseve eksportuese dhe të sektorëve që arkëtojnë në euro, ndërsa krijon vështirësi edhe për ekonomitë familjare që varen nga të ardhurat e siguruara jashtë vendit.
