Një incident i rëndë është regjistruar në bordin e një avioni të kompanisë ajrore , i cili po fluturonte nga Turqia drejt Mançesterit, duke detyruar pilotin të kryente një ulje emergjente në Bruksel.
Shkak u bë një përleshje mes dy pasagjerëve britanikë, e cila degjeneroi në dhunë fizike në korridorin e avionit, duke përhapur panik te udhëtarët në bord, mes tyre familje me fëmijë dhe persona të moshuar.
Sipas dëshmitarëve, konflikti nisi kur njëri prej pasagjerëve, i dyshuar për konsum të tepruar alkooli, tentoi t’i merrte telefonin një tjetri. Situata u përshkallëzua me ofendime verbale dhe më pas në përleshje fizike. Disa pasagjerë raportuan se në dysheme u panë edhe njolla gjaku dhe dhëmbë të thyer.
“Ishim të frikësuar, atmosfera ishte kaotike,” u shpreh një prej udhëtarëve, duke theksuar se ekuipazhi reagoi me qetësi dhe profesionalizëm për të vënë situatën nën kontroll.
Pas uljes emergjente në Bruksel, policia ndërhyri menjëherë dhe arrestoi dy personat e përfshirë. Piloti i avionit, me mbi 30 vite përvojë, deklaroi se nuk kishte përjetuar kurrë një incident kaq ekstrem gjatë karrierës së tij.
Pas procedurave përkatëse, fluturimi vijoi drejt destinacionit final në Mançester.
Kompania ajrore e cilësoi sjelljen e pasagjerëve si “të papranueshme” dhe njoftoi se ata do të ndalohen përjetë nga fluturimet e saj. Rasti rikthen në vëmendje rrezikun që paraqesin sjelljet e dhunshme në bord dhe sfidat me të cilat përballen ekuipazhet për të garantuar sigurinë e të gjithë udhëtarëve.
