Komisioni Evropian ka prezantuar sot “Digital Omnibus”, një paketë të re për thjeshtimin e rregulloreve digjitale në Bashkimin Evropian.
Një ndër aktet që prek kjo paketë është edhe Ligji për Inteligjencën Artificiale (IA), i miratuar vitin e kaluar dhe që po zbatohet me faza.
Sipas njoftimit, disa prej rregullave për teknologjitë me “risk të lartë” pritet të shtyhen deri në dhjetor 2027 – më shumë se një vit pas afatit të planifikuar të gushtit 2026.
Kjo shtyrje pritet të ketë ndikim të drejtpërdrejtë në treg. Nëse “Digital Omnibus” miratohet, modelet e IA do të mund të vazhdojnë të përdorin të dhëna të kufizuara për vendime të rëndësishme, përfshirë aksesin në shërbime financiare.
Peter Norwood nga Finance Watch e quajti nismën një strategji “de-regulimi për të përshpejtuar”, duke paralajmëruar se konsumatorët rrezikojnë të dëmtohen.
Ai theksoi se, nën këto kushte, një qytetar mund të refuzohet për kredi për shkak të rezultateve të një modeli IA me paragjykime.
Komisioni argumenton se vonesa lidhet me mungesën e kapaciteteve të zbatimit në disa shtete anëtare dhe nevojën e kompanive për më shumë kohë për t’u përshtatur me kërkesat e reja.
Nga ana e tyre, grupet lobuese të sektorit, përfshirë CCIA që përfaqëson kompani si Amazon dhe Google, e përshëndetën shtyrjen, por kërkuan hapa edhe më të guximshëm.
Ata kritikuan propozimin për mos rritjen e pragut të identifikimit të modeleve me “risk sistemik” dhe për formulimet e paqarta në lidhje me të drejtat e autorit.
Nga ana tjetër, organizatat e mbrojtjes së konsumatorëve paralajmërojnë se paketat e reja po lëvizin drejt një deregulimi që favorizon kompanitë e mëdha të teknologjisë.
Agustín Reyna nga BEUC theksoi se BE-ja u pati premtuar qytetarëve dhe bizneseve thjeshtim, por jo në kurriz të sigurisë së tyre digjitale.
Edhe pse Franca dhe Gjermania mbështesin Ligjin për IA, ekspertë të pavarur shprehen se shumë vende anëtare ende nuk kanë ngritur strukturat e nevojshme për zbatimin e tij.
Përveç kësaj, “Digital Omnibus” përballet me rezistencë të konsiderueshme, pasi kërkon ndryshime në GDPR – një çështje që ka ndarë eurodeputetët dhe pritet të hapë një debat të fortë në Parlamentin Evropian.
