Gjendja shëndetësore e tri motrave të mitura, të moshës 3, 7 dhe 11 vjeçare, që u shtruan me urgjencë në spital pas helmit nga karamelet me esencë kanabisi, ka pësuar një përmirësim të dukshëm.
Vajzat, pjesë e një familje në Korçë, konsumuan disa karamele që dyshohet se përmbanin substancën narkotike cannabis sativa, çka i shkaktoi atyre gjendje të rëndë shëndetësore.
Burime nga shërbimi pediatrik i spitalit rajonal të Korçës konfirmojnë se vajzat 7 dhe 11-vjeçare janë jashtë rrezikut për jetën dhe ndodhen në gjendje të qëndrueshme. Ndërkohë, motra më e vogël, vetëm 3 vjeçe, është stabilizuar, por vijon të mbahet nën kujdes të specializuar në repartin e reanimacionit.
Ngjarja që tronditi opinionin publik, ndodhi disa ditë më parë, kur fëmijët u dërguan me urgjencë në spital pas konsumimit të disa karameleve që dyshohet se kishin përmbajtje narkotike. Hetimet e policisë janë në vijim për të zbardhur rrethanat e plotë të ngjarjes dhe për të përcaktuar se si karamelet përfunduan në duar të fëmijëve.
