Ish-deputeti i Partisë Demokratike, Ervin Salianji ka reaguar nga burgu i Fierit për ndarjen nga jeta të Kryepeshkopit Anastas Janullatos. Salianji shprehet se për më shumë se 33 vjet, Kryepeshkopi kontribuoi në ringritjen nga hiri të besimit ortodoks dhe rindërtimin e infrastrukturës kishtare.
Më tej në reagimin e ish-deputeti thuhet se edhe në ditët e fundit të jetës së tij ai u kujdes për plotësimin e klerit me peshkopë të rinj shqiptarë si një misionar i Krishtit.
POSTIMI I PLOTË:
Me keqardhje u njoftova për ndarjen nga jeta të Fortlumturisë së Tij, Kryepiskopit të Tiranës, Durrësit dhe gjithë Shqipërisë, Prof. Dr. Anastas Janullatos. Primati i Kishës Ortodokse Autoqefale të Shqipërisë është një hierark i dimensioneve botërore, akademik dhe teolog me kontribut shumëvjeçar në dialogun dhe harmoninë ndërfetare, pajtimin mes popujve dhe paqen në botë.Ai për më shumë se 33 vjet kontribuoi në ringritjen nga hiri të besimit ortodoks dhe rindërtimin e infrastukurës kishtare, që ishin shkatërruar plotësisht nga persekutimi komunist. Edhe ditët e fundit të jetës së tij ai u kujdes për plotësimin e klerit me peshkopë të rinj shqiptarë si një misionar i Krishtit.Mendimet e mia sot, bashkohen me komunitetin ortodoks shqiptar dhe lutem bashkë me ta që Zoti ta prehë shpirtin e Kryepiskopit Anastas së bashku me rrjeshtat e shenjtorëve dhe martirëve të Kishës, së cilës ai i shërbeu me vetëmohim. I përjetshëm qoft kujtimi i Tij.
