Chelsea është ndëshkuar me një gjobë rekord prej 10 milionë paundësh nga Premier League, pasi pranoi se kishte kryer pagesa të fshehta me vlerë totale 47 milionë paund ndaj agjentëve të paregjistruar dhe palëve të treta në disa transferime të realizuara mes viteve 2011 dhe 2018.
Bëhet fjalë për gjobën më të lartë të vendosur ndonjëherë nga Premier League, duke kaluar rekordin e mëparshëm prej 5.5 milionë paundësh që iu dha West Ham United në vitin 2007 për çështjen e transferimeve të Javier Mascherano dhe Carlos Tevez.
Pavarësisht shkeljeve të konstatuara, Chelsea shmangu një sanksion sportiv, siç mund të ishte heqja e pikëve, pasi sipas Premier League, klubi bëri vetëdenoncim vullnetar për shkelje historike të rregullave dhe bashkëpunoi plotësisht me hetimin.
Përveç gjobës financiare, Chelsea është ndëshkuar edhe me një ndalim të menjëhershëm në merkato për akademinë për një periudhë nëntëmujore, si edhe me një gjobë shtesë prej 750 mijë paundësh, për shkelje që lidhen me regjistrimin e lojtarëve të akademisë në periudhën 2019-2022.
Në raportin e Premier League përmenden disa transferime të rëndësishme, mes tyre ato të Eden Hazard, Samuel Eto’o, Willian, Ramires, David Luiz, Andre Schurrle dhe Nemanja Matić. Nuk ka asnjë pretendim për shkelje nga ana e vetë lojtarëve. Raporti përmend gjithashtu pagesa për përfaqësuesit e katër futbollistëve të tjerë, por emrat e tyre janë fshirë nga dokumenti dhe deri tani nuk është dhënë një shpjegim zyrtar për këtë.
Shkeljet kanë ndodhur gjatë periudhës kur klubi ishte në pronësi të Roman Abramovich. Sipas Premier League, bëhej fjalë për pagesa të padeklaruara nga palë të treta të lidhura me klubin, të kryera për përfitim të Chelsea-t.
Liga angleze sqaroi gjithashtu se gjoba fillestare do të kishte qenë 20 milionë paund, por u ul me 50 për qind për shkak të vetëraportimit proaktiv të klubit dhe bashkëpunimit të tij gjatë procesit hetimor. Chelsea i raportoi vetë këto shkelje të mundshme pasi konsorciumi i Todd Boehly mori në pronësi klubin në vitin 2022.
Në një reagim zyrtar, klubi londinez theksoi se që nga fillimi i procesit i ka trajtuar këto çështje me seriozitet maksimal dhe ka ofruar bashkëpunim të plotë me të gjithë rregullatorët përkatës.
Premier League bëri të ditur se Chelsea nuk do të kishte shkelur rregullat e Profitability and Sustainability gjatë sezoneve përkatëse edhe nëse këto pagesa do të ishin regjistruar siç duhej, ndaj heqja e pikëve nuk u konsiderua një masë e përshtatshme.
Kjo nuk është hera e parë që klubi përballet me pasoja financiare për çështje të tilla. Në vitin 2023, Chelsea u gjobit me 8.6 milionë euro nga UEFA për paraqitje të paplotë të informacionit financiar për periudhën 2012-2019. Ndërkohë, një procedurë e veçantë disiplinore nga Federata Angleze mbetet ende në vijim për përdorimin dhe pagesat ndaj agjentëve të paregjistruar.
Gjatë periudhës 2011-2018, Chelsea fitoi dy tituj të Premier League, dy FA Cup, një Champions League, një Europa League dhe një League Cup. Klubi pati gjashtë trajnerë të përhershëm në atë hark kohor, por nuk ka asnjë pretendim që ndonjë prej tyre të ketë qenë i përfshirë në shkeljet e konstatuara.
Trajneri aktual Liam Rosenior deklaroi se çështja nuk përbën një shpërqendrim negativ për skuadrën, duke theksuar se tani duhet hedhur një vijë dhe klubi të fokusohet te ndërtimi i një të ardhmeje më të fortë dhe më të qëndrueshme.
