Në një ceremoni të organizuar gjatë festës së fundvitit nga Drejtoria Vendore e Policisë Tiranë, drejtori i Përgjithshëm i Policisë së Shtetit, Ilir Proda, i dha inspektorit Marsel Bicja “Certifikatën për Shërbime të Dalluara”. Ky vlerësim i akordohet Bicjas për veprimin e tij heroik, ku ndërhyri me profesionalizëm dhe shpëtoi jetën e një qytetari, duke e shpëtuar nga djegia pas një shpërthimi të një bombe molotov.
Motivimi i certifikatës ishte: “Për aktin e humanizmit dhe profesionalizmit të treguar gjatë ushtrimit të detyrës, ku me ndërhyrjen e tij të shpejtë dhe vendimtare, shpëtoi jetën e një qytetari, duke vendosur mbrojtjen e jetës njerëzore në fokus, si një vlerë e lartë dhe mision kryesor i Policisë së Shtetit.”
Gjatë ceremonisë, Proda falënderoi Bicjan për veprimin e tij dhe theksoi se ky akt dëshmoi angazhimin dhe humanizmin e Policisë së Shtetit për të mbrojtur jetën e qytetarëve. Ai e inkurajoi inspektorin të vazhdojë të përmbushë këtë mision me përkushtim, pavarësisht vështirësive.
Po ashtu, drejtori i Policisë Tiranë, Elton Alushi, e vlerësoi veprimin e Bicjas, duke theksuar se ai veproi përtej çdo urdhri të komandës, duke u udhëhequr nga ndjenja njerëzore dhe përgjegjësia e uniformës që mban.
Nga ana e tij, inspektori Marsel Bicja falënderoi për certifikatën dhe theksoi se veproi menjëherë, pa hezituar, pasi mbrojtja e jetës së qytetarëve është gjithmonë prioritet për të dhe kolegët e tij.
