Një nga grabitjet më të pazakonta të vitit është regjistruar në Francë. Mediat atje raportojnë se persona të paidentifikuar vodhën rreth 450 kilogramë kërmij nga një fermë në Francën verilindore, duke shkaktuar dëme që tejkalojnë 100,000 dollarë dhe duke e lënë pronarin në dëshpërim vetëm disa javë para kërkesës maksimale për festat.
Biznesi familjar L’Escargot Des Grands Crus njoftoi në Facebook se kishte qenë viktimë e një vjedhjeje, ku autorët kishin hequr pothuajse të gjithë stokun e kërmijve të freskët dhe të ngrirë. Kompania, e cila mbarështon rreth 350,000 kërmij në vit, konstaton se kanë mbetur të “tronditur” nga ky akt që kërcënon kapacitetin e saj të prodhimit përpara Krishtlindjeve dhe Vitit të Ri.
Sipas France Info, hajdutët hynë me forcë në orët e para të së hënës, duke shkuar drejt e në zonat e magazinimit dhe duke zbrazur pothuajse plotësisht dhomat e ftohta. “Ata hynë brenda dhe e gjetën veten përpara rafteve plot me kërmij: në kavanoza, të freskëta, të ngrira“, tha pronari Jean-Mathieu Dauvergne.
Një pjesë e stokut të vjedhur nuk ishte përpunuar ende, pasi guaskat nuk ishin pastruar dhe gjalpi që shoqëron produktin nuk ishte bërë. “Nuk mund ta hash menjëherë“, tha Dauvergne.
Dëmi është i madh për biznesin, pasi rreth 60% e të ardhurave të tij vjetore vijnë nga sezoni festiv.
Megjithatë, pronari ka arritur të furnizojë disa restorante, madje edhe klientë me yje Michelin, falë ndihmës së fermerëve të tjerë të kërmijve, të cilët i kanë dhënë një pjesë të stokut të tyre me çmime të ulëta.
“Ne jemi të gatshëm ta ndihmojmë të shpëtojë sezonin e tij”, tha për France Info Alexandre Maire, gjithashtu një fermer, duke nënvizuar mobilizimin e sektorit pas kësaj vjedhjeje të pazakontë.
