Pavarësisht rënies së temperaturave, erërat e forta po pengojnë përpjekjet e zjarrfikësve për të vënë nën kontroll zjarret, të cilat kanë shpërthyer prej më shumë se 10 ditësh në Spanjën perëndimore. Zjarrfikësit, të mbështetur nga ushtarë dhe avionë, vazhdojnë të luftojnë 21 fronte zjarri, niveli 2, që do të thotë se ato përfaqësojnë një kërcënim të menjëhershëm për popullsinë.
“Temperaturat kanë rënë, por erërat e forta vazhdojnë ta ndërlikojnë detyrën e shuarjes së zjarreve dhe mungesa e shiut nuk po ndihmon, edhe nëse shpresojmë se kjo do të ndryshojë në ditët në vijim”, tha drejtori i përgjithshëm i shërbimit të Mbrojtjes Civile të vendit.
Sipas agjencisë meteorologjike spanjolle (Aemet), këto erëra pritet të dobësohen në fund të ditës, me nivele lagështie më të larta dhe për këtë arsye më të favorshme për shuarjen e zjarreve. Reshje shiu priten edhe nesër në disa nga zonat e prekura nga zjarret.
Spanja sapo ka dalë nga një valë ekstreme e të nxehtit, e cila zgjati 16 ditë, me temperatura që tejkalonin 40 gradë Celsius në shumë rajone. Nxehtësia mbytëse kontribuoi në shpërthimin e zjarreve të shumta që çuan në evakuimin e dhjetëra fshatrave dhe morën jetën e katër personave në vend.
Linja hekurudhore që lidh Madridin me Galician, ku shërbimet ishin pezulluar ditët e fundit për shkak të zjarreve, pritet të rihapet më vonë sot, njoftoi kompania spanjolle e menaxhimit të rrjetit hekurudhor (Adif). Edhe pse shumë zjarre u shkaktuan nga rrufeja gjatë “stuhive të thata”, pa shi, të tjerat ishin rezultat i zjarrvënies së qëllimshme.
Pothuajse 4,000,000 hektarë tokë janë djegur tashmë në Spanjë këtë vit, sipas Sistemit Evropian të Informacionit për Zjarret në Pyje (EFFIS), një numër që tejkaloi rekordin e mëparshëm prej 3,060,000 hektarësh në vitin 2022, deri atëherë viti më i keq që nga fillimi i mbajtjes së të dhënave në vitin 2006.
