Në ambientet e Gjykatës së Vlorës është zhvilluar sot seanca gjyqësore për Bertil Alliajn, 32 vjeç, i cili disa ditë më parë vrau me 6 plumba kushëririn e tij, Dalan Alliaj, 36 vjeç.
I shoqëruar nën masa të forta sigurie, Alliaj pritet të dalë për vlerësimin e masës së sigurisë.
Sipas burimeve zyrtare, 32-vjeçari ishte i shpallur në kërkim për masakrën e Çoles të ndodhur në vitin 2015, ndërsa ndaj tij ka një dënim në mungesë prej 35 vitesh burgim.
“E vrava për një arsye të fortë që s’mund ta them, pasi i kisha thënë disa herë që duhet të reagonte. Ndoshta në një moment tjetër do të flas për arsyen, por ende nuk jam gati”
Kjo ka qenë dëshmia që ka dhënë para policisë 32-vjeçari Bertil Alliaj, i cili ka pranuar krimin.
Bertil Alliaj pasi qëlloi me 6 plumba në trup djalin e xhaxhait, u fsheh në një zonë të pyllëzuar. Arratisja e tij do të zgjaste vetëm 5 orë, ku më pas do të arrestohej nga policia e cila kishte vënë në dispozicion edhe dronët inteligjentë.
32-vjeçari cilësohet nga policia si një person me rrezikshmëri të lartë shoqërore dhe ishte shpallur në kërkim për vrasjen e 3 të rinjve në vitin 2015.
Gjykata e Vlorës e kishte dënuar me 35 vite burgim në vitin 2016, pikërisht për këtë ngjarje të rëndë.
