Vinicius Junior ka folur hapur në konferencën për shtyp para sfidës mes Real Madrid dhe Bayern Munich, duke prekur disa nga temat më të nxehta të momentit, nga raporti me Kylian Mbappe te marrëdhënia me trajnerët Xabi Alonso dhe Arbeloa, si edhe rinovimi i kontratës me klubin madrilen.
Sulmuesi brazilian u ndal fillimisht te bashkëpunimi me Mbappe, duke theksuar rëndësinë që ka francezi për skuadrën. “Njerëzit thonë shumë gjëra. Kylian është këtu për të ndihmuar, na jep besim me golat e tij. Duhet të jemi të përqendruar nesër. Është një ndeshje e vështirë ku lojtarët e mëdhenj bëjnë diferencën, dhe Mbappe është një prej tyre”, deklaroi Vinicius.
Një nga momentet më interesante të konferencës ishte kur ai foli për raportin me Arbeloan dhe Xabi Alonso. Braziliani pranoi se me Arbeloan ka një lidhje shumë të veçantë, të ngjashme me atë që kishte më parë me Ancelottin. “Kam pasur një lidhje speciale me Arbeloan, ashtu siç e kisha me Ancelottin. Ai ma ka bërë gjithmonë të qartë se çfarë kërkon nga unë. Unë kam dhënë gjithmonë maksimumin dhe do të vazhdoj ta bëj këtë”, u shpreh ai.
Vinicius komentoi edhe periudhën e vështirë që po kalon, duke pranuar se nuk i kishte ndodhur prej kohësh të qëndronte kaq gjatë pa shënuar. “Nuk besoj se kam kaluar ndonjëherë kaq shumë kohë pa shënuar gol. Kam mësuar nga kjo periudhë e vështirë dhe dua të vazhdoj të mësoj. Lojtarët më të mirë gjithmonë rikthehen”, tha ai.
Sa i përket largimit të Xabi Alonso dhe faktit që nuk pati një përshëndetje publike, Vinicius u tregua i sinqertë. “Kam luajtur disa ndeshje, por jo shumë minuta. Çdo trajner ka metodat e veta dhe unë nuk u lidha me të ashtu siç ai dëshironte. Gjithsesi, ishte një eksperiencë nga e cila mësova. Shpresoj të vazhdoj me Arbeloan, me të cilin kam një lidhje të mrekullueshme dhe që më ka dhënë gjithmonë besim”, theksoi ai.
Braziliani foli edhe për të ardhmen e tij te Real Madrid, duke lënë të kuptohet se dëshira e tij është të qëndrojë gjatë në “Santiago Bernabeu”. “Shpresoj të qëndroj këtu për një kohë të gjatë. Më ka mbetur edhe një vit kontratë, por jam shumë i qetë. Kam besimin e presidentit. Në momentin e duhur do të rinovoj dhe do të qëndroj këtu për shumë kohë, sepse ky është klubi i ëndrrave të mia”, deklaroi Vinicius.
Në fund, ai foli edhe për rëndësinë e ndeshjes ndaj Bayern Munich, duke vlerësuar rolin që kanë tifozët në sfida të tilla. “Pa dyshim, lidhja mes lojtarëve dhe tifozëve ndryshon gjithmonë dinamikën e ndeshjeve në shtëpi dhe të takimeve të Champions League. Na pret një skuadër e fortë, por ne kemi eksperiencë në këto ndeshje dhe shpresojmë të bëjmë gjërat si duhet”, përfundoi ylli brazilian.
