UEFA ka vendosur të ndryshojë kalendarin dhe formatin e garave të kombëtareve duke nisur nga sezoni 2028/2029, pas përfundimit të Europianit.
Sipas formatit të ri, kualifikueset për Nations League, Botëror dhe Europian do të zhvillohen me një sistem të ngjashëm me atë të Champions League. Kombëtaret nuk do të luajnë më dy herë ndaj të njëjtit kundërshtar, në shtëpi dhe në transfertë, por vetëm një ndeshje ndaj secilit rival.
Nations League do të ndryshojë gjithashtu strukturë. Nga katër liga që ka aktualisht, do të kalojë në tre liga me nga 18 skuadra. Çdo ligë do të ndahet në grupe, ku kombëtaret do të luajnë gjashtë ndeshje ndaj kundërshtarëve të ndryshëm.
Edhe kualifikueset europiane për Botërorin do të ndahen në dy nivele. Liga 1 do të përbëhet nga skuadrat e Nations League A dhe B, ndërsa Liga 2 nga kombëtaret e tjera.
Skuadrat më të mira të grupeve në Ligën 1 do të kualifikohen direkt, ndërsa vendet e mbetura do të vendosen përmes play-off. Ky sistem do t’u japë mundësi edhe kombëtareve të Ligës 2 të luftojnë për një vend në turnetë e mëdhenj.
Me këtë ndryshim, UEFA synon ta bëjë futbollin e kombëtareve më konkurrues, më të ngjashëm me formatin e ri të Champions League dhe me më pak ndeshje të përsëritura mes të njëjtave skuadra.
