Bayern Munich ka marrë një lajm shumë pozitiv në prag të rikthimit të Bundesligës, pasi Vincent Kompany është rikthyer zyrtarisht në detyrën e trajnerit.
Tekniku belg kishte munguar gjatë javëve të fundit për shkak të problemeve shëndetësore që e detyruan të shtrohej në spital muajin e kaluar.
Kompany u rrëzua më 23 tetor teksa po ndiqte një seancë stërvitore të ekipit të dytë të Bayern Munich dhe më pas u diagnostikua me irritim meningeal.
Pas daljes nga spitali dhe periudhës së rikuperimit në shtëpi, ai humbi pesë ndeshje në të gjitha kompeticionet. Gjatë mungesës së tij, asistenti Aaron Danks drejtoi skuadrën dhe regjistroi katër fitore dhe një barazim.
Tashmë, Kompany ka konfirmuar se ndihet mirë dhe është gati të rikthehet në stol.
“Gjatë asaj periudhe të qetë përpiqesh edhe të mësosh. Ishte interesante ta shihja skuadrën nga një këndvështrim tjetër, mënyrën si punonin lojtarët dhe stafi. Tani ndihem shumë mirë dhe jam shumë i lumtur që jam rikthyer me ekipin”, deklaroi ai.
Trajneri 40-vjeçar pritet të drejtojë Bayernin në ndeshjen e Bundesligës ndaj Kölnit në “Allianz Arena”, të premten më 20 nëntor.
Bavarezët rikthehen në kampionat si kryesues të tabelës me 21 pikë.











