Ish-ministri Saimir Tahiri u mor në pyetje ditën e sotme nga prokurorët e SPAK në lidhje me dosjen për “21 Janarin”. Para gazetarëve, Tahiri deklaroi se është pyetur për rolin që ka pasur në datën 21 janar dhe një kallëzim që ka bërë në vitin 2015. Ai thekson se në protestën e 21 janarit ka qenë protestues.
“U pyeta për rolin që kam pasur në datën 21 janar dhe kallëzimin që kam bërë në vitin 2015. I qëndroj pikë për pikë asaj që kam thënë. Roli im ka qenë protestues. Të gjithë kemi qenë protestues. Është një ngjarje që duhet zbardhur. Shpresoj shumë të zbardhet”, deklaroi ai pasi doli nga SPAK.
Kujtojmë se SPAK ka rihapur hetimet për çështjen e “21 Janarit”, ku humbën jetën 4 protestues, Ziver Veizi, Faik Myrtaj, Hekuran Deda dhe Aleks Nika.
Prokuroria e Posaçme njoftoi në korrik të këtij viti se ka regjistruar zyrtarisht procedim penal për vrasjen e protestuesit Aleks Nika më 21 Janar 2011. Të plagosur mbetën dhe shtetasit Artes Dybeli, Ilia Qesko e Ilia Papa.
Hetimi ka për qëllim të zbardhë rolin e ish-kryeministrit Sali Berisha dhe ish-ministrit të Brendshëm Lulzim Basha. Vendimi i Gjykatës së Lartë thekson detyrimin e SPAK për të hetuar përgjegjësitë e Sali Berishës, Lulzim Bashës, Ndrea Prendit dhe të tjerëve lidhur me vrasjen e katër personave të pafajshëm në bulevard, ngjarje për të cilën deri më tani nuk është verifikuar roli i drejtuesve shtetërorë.
Janë tre vepra të rënda penale për të cilat është regjistruar ky procedim penal, pasi dyshohet se ato mund të jenë kryer nga ish-funksionarë të lartë shtetërorë, gjatë ushtrimit të detyrës.
– “Vrasja në rrethana të tjera cilësuese”, e kryer në bashkëpunim, kundër dy ose më shumë personave dhe në mënyrë të rrezikshme për jetën e shumë personave, e parashikuar nga neni 79 gërmat “dh” dhe “ë”, si dhe 25 të Kodit Penal.
– “Shpërdorim i detyrës”, e kryer në bashkëpunim, parashikuar nga nenet 248 dhe 25 të Kodit Penal;
– “Kryerja e veprimeve që pengojnë zbulimin e së vërtetës”, e kryer në bashkëpunim, parashikuar nga nenet 301 dhe 25 të Kodit Penal.
/ilirianews
