Partia Demokratike mbledh këtë të shtunë Kuvendin Kombëtar, organin më të lartë vendimmarrës të selisë blu, në një moment kyç për të ardhmen politike të forcës më të madhe opozitare në vend. Kuvendi pritet të përcaktojë strategjinë politike të PD-së për katër vitet e ardhshme në opozitë, si dhe objektivat për zgjedhjet lokale të vitit të ardhshëm dhe ato parlamentare të vitit 2029.
Me sloganin “Ripërtëritje”, kryetari i PD-së, Sali Berisha, ka paralajmëruar hapje dhe modernizim të partisë, duke premtuar përfshirjen e figurave të reja në strukturat drejtuese.
Punimet e Kuvendit do të nisin në orën 10:00 dhe hapja do të bëhet nga Erisa Bajaziti, e cila kandidoi në zgjedhjet parlamentare si përfaqësuese e diasporës shqiptare.
Më pas fjalën do ta marrë lideri demokrat, Sali Berisha, i cili vetëm një javë më parë mori votëbesimin e anëtarësisë për të drejtuar partinë deri në vitin 2030. Në fjalimin e tij pritet të prezantojë vizionin dhe strategjinë për rikthimin e demokratëve në pushtet dhe përballjen politike me Partinë Socialiste të drejtuar nga Edi Rama.
Pas fjalës së kryetarit, delegatët do të votojnë ndryshimet statutore, ku ndër më të rëndësishmet janë përfshirja e diasporës me kuota të dedikuara në strukturat e partisë dhe rritja e përfaqësimit të grave në forumet drejtuese.
Kuvendi do të ketë edhe karakter zgjedhor, pasi delegatët do të votojnë për 200 anëtarët e rinj të Këshillit Kombëtar. Ky forum pritet të zgjedhë javën e ardhshme kryesinë e re të PD-së, sekretarin e përgjithshëm, nënkryetarët dhe drejtuesit e tjerë të partisë.
Mbetet për t’u parë nëse Sali Berisha do të vijojë betejën politike ndaj Edi Rama me të njëjtin ekip drejtues apo do të sjellë emra të rinj në kupolën e Partisë Demokratike.
